Тіл - ұлттың жаны, халықтың үні

     Мақсаты:

     1.Ана тілде таза сөйлеуге, терең меңгеруге баулу.

     2.Ой, ес,сезім, тіл жылдамдықтарын дамытып, бірліктерін нығайту.

     3.ана тілін сүюге, қадірлеуге тәрбиелеу.

     Көрнекілік: қанатты сөздер, суреттер, шарлар.

     Барысы:

     І. Ұйымдастыру кезеңі.

     ІІ. Кіріспе.

     ІІІ. Қазақстан Республикасының мемлекеттік әнұраны.

     1-бала: Ж.Молдағалиевтің «Мен қазақпын» өлеңі оқылады.

     2-бала: 

     Қуан бабам, қуанатын күн бүгін,

     Деген едің «Тіл бар жерде өмір бар!»

     «Халық жауы» атандық-ау сол үшін,

     Ғұмырыңды құрбан етіп жолында.

     3-бала:

     Қуан бабам! Туған тілдің киесі,

     Жебеп сені, болғаныңа иесі.

     Тек мұнымен бітпейтінін ұғып өс,

     Дүниеде тіршіліктің күресі.

     4-бала:

     Қуан анам! Ұзағынан сүйініп,

     Сәтінде кеткен кейін түңіліп.

     Ақ сүтіңмен бойға біткен тіліңді,

     Пір тұтамын ел алдында иіліп.

     5-бала:

     Қуан халқым! Күшіне енді «Тіл заңы»

     «Сүйінші!» - деп ақын ұлың жырлады.

     Ел елдігі бағаланып тілімен,

     Сол арқылы құлпырады гүл бағы.

     Хор: Ә. Тінәлиевтің әні «Анамның тілі, аяулы үні».

     6-бала:

     Қабылданды мемлекеттік «Тіл заңы»

     Елдігімнің, ұлтымыздың ол – жаны.

     Қуанамыз, шатанамыз бәріміз,

     Атқанына бостандықтың ақ таңы.

     7-бала:

     Ана тілім – қазақ тілім, туған тіл,

     Қасиетті тіліміздің мәнін біл.

     Ана тілді құрметтеңдер адамдар.

     Заманға сай өзге тілдің бәрін біл.

     8-бала:

     Заман туды тіліміздің басына,

     Айналдырған тілдердің бір ласына.

     Жетпіс жылдай бұрмалаған бұл тілді,

     Үйретіп көр сәулесі жоқ жасыңа.

     9-бала:

     Ана тілі – біздің туған анамыз,

     Ана тілін бағаласақ қалай біз.

     Өзіміздің сондай болмақ бағамыз,

     Ана тілін кім бағалай білмесе,

     «Анасынан безген ұл» - деп қараңыз.

     10-бала:

     Ана тілің – біліп қой,

     Бостандығың, теңдігің.

     Ана тілің – біліп қой,

     Мақтанышың, елдігің.

     11-бала:

     Ана тілің – арың бұл,

     Ұятың боп тұр бетте.

     Өзге тілдің бәрін біл,

     Өз тіліңді құрметте.

     12-бала:

     Ақыл-ойың дананың,

     Ана тілден аламын.

     Ана тілім ардақты,

     Ақ сүтіндей анамның.

     13-бала:

     Өсірген ой, білімді,

     Сүйем туған тілімді.

     Мақсат етем әр сөздің,

     Мәнін терең білуді.

     Хор: «Ұланбыз – Отанды қорғайтын».

     14-бала: Әр халықтың ана тілі – білімнің кілті. Біздің жастарымыз ана тіліне жетік, білімді, мәдениетті болсын. (Ахмет Жұбанов.)

     15-бала: Анамыздың ақ сүтімен бойымызға дарыған тілімізді ұмыту – бүкіл ата-бабамызды, тарихымызды ұмыту. (Б. Момышұлы.)

     16-бала:  Сүйемін туған тілді – ана тілін,

              Бесікте жатқанымда-ақ берген білім.

                               (С. Торайғыров.)

     17-бала:

     Туған тілім – бабам тілім – өз тілім!

     Туған тілім – анам тілім – өз тілім!

     Туған тілім – далам тілім – өз тілім!

     Туған тілім – адам тілім – өз тілім!

     18-бала:

     Туған тілде сыры терең жаным бар,

     Туған тілде әнім менен сәнім бар.

     Туған тілім тіл болудан қалса егер,

     Жүрегімді суырып-ақ алыңдар.

     19-бала:  (М. Мақатаев. «Үш бақытым»):

     Ең бірінші бақытым – Халқым менің,

     Соған берем ойымның алтын кенін.

     Ол бар болса, мен бармын, қор болмаймын,

     Қымбаттырақ алтыннан нарқым менің.

     20-бала:

     Ал, екінші бақытым – Тілім менің,

     Тас жүректі тіліммен тілімдедім.

     Кей-кейде дүниеден түңілсем де,

     Қасиетті тілімнен түңілмедім.

 

     21-бала:

     Бақытым бар үшінші – Отан деген,

     Кім мықты? – десе біреу, - Отан дер ем.

     ...Оты сөнген жалғанда жан барсың ба?

     Ойланбай-ақ кел – дағы от ал менен.

     22-бала:

     Әрбір тілде сөйле әлемді таң қылып,

     Ана тілін білмеу қандай заңдылық.

     Өсер балаң, байтақ далаң тұрғанда,

     Қазақ тілі жасау керек мәңгілік.

     23-бала:

     Ақиқатты мойындайық қазір біз,

     «Ұлтшыл» болып талай таяқ жегенбіз.

     Тіл – мәртебе, ұлт мерейі емес пе?

     Мәңгі бақи шырқалатын әніміз.

     24-бала:

     Туған тілім тірлігімнің айғағы,

     Тілім барда айтылар сыр ойдағы.

     Өссе тілім, мен де бірге өсемін,

     Өлсе тілім, мен де бірге өлемін.

     Хор:

     Ана тілі – ұраным,

     Ана тілі – Құраным.

     Ана тілі болмаса,

     Мықты болмас тұрағым.

     Тәрбиеші:  Біздің Республикамыз жылдан жылға, күннен күнге өркендеп өсіп, кеңейіп, гүлденіп келеді. Олай болса, ХХІ ғасырға ақ тілек тілейік.

     25-бала:

     Басшыларымыз,

     Мерекелеріміз табысты болсын!

     Қыздарымыз саналы, сұлу,

     Ұлдарымыз намысты болсын!

     Қалада мейлі, қырда болсын,

     Келген-кеткен ырза болсын!

     Баға сөмкемізге сыймайтын болсын!

     Халқымыз ғасыр табалдырығын,

     Қазақша сөйлеп, аттайтын болсын!

     Хор: Ө. Байділдаевтің әні «Туған ел».

Соңғы жарияланған материалдар тізімі

Жасай бер ана тілім –қазақ тілі. Ана тілім – дана тілім. Тіл байлығы-ел байлығы Тіл тірегіміз, соғып тұрған жүрегіміз Тілім менің тірлігімнің айғағы Шығарма Анамның тілі- ардақтым менің Мемлекеттік тіл - менің тілім! Мемлекеттік тіл – менің тілім Ана тілім – асыл қазынам! Тілім менің – асыл қазынам

Бөлім: Уроки / Балабақша | Көрсетілім: 4543 | Қосты: NA | Ілмек сөздер: